Este xoves, 23 de outubro , presentamos Mauro , de Mikel Guerendiain , ás 20:00 h. no Museo Municipal Manuel Torres. Mauro é a primeira novela de Mikel Guerendiain, que nace da que está considerada unha das maiores evasións carcerarias de Europa: a fuga do penal franquista de San Cristóbal, en Pamplona , o 22 de maio de 1938. Arredor de oitocentos presos participaron nela e moitos deles foron abatidos ou detidos nas horas seguintes, pero outros lograron escapar polos montes do norte de Navarra tentando chegar á fronteira con Francia. Durante días mantívose a cacería na que se viron envoltos non só os fuxidos e os perseguidores, senón tamén os habitantes deses pobos fronteirizos, que viron alteradas as súas vidas. MIKEL GUERENDIAIN AZPIROZ, naceu en Ciaurriz, Navarra, en 1983, é Licenciado en Historia pola Universidade de Navarra e na actualidade exerce como profesor de Xeografía e Historia.
Buscamos a recuperación e divulgación da memoria histórica de todas as persoas, marinenses, galegas e galegos, de moi diversas ideoloxías, leais á II República, que logo do levantamento militar de 1936 foron asesinadas, perseguidas, represaliadas, torturadas, inxustamente xulgadas, forzadas ó exilio ou pasaron á resistencia armada na guerrilla antifranquista. Non pode entenderse o presente e construir o futuro se ignoramos o noso pasado. Verdade. Xustiza. Reparación