Asociación pola Recuperación da Memoria Histórica de Marín (ARMH Marín)

PRESENTACIÓN DO LIBRO AMADA GARCÍA E OS SEUS ARREDORES DO HISTORIADOR BERNARDO MÁIZ VÁZQUEZ PUBLICADO POR EDICIÓNS EMBORA MÉRCORES 24 DE MAIO ÁS 19.00 H. NO PATIO INTERIOR DO VELLO CÁRCERE DE LUGO Amada García, encarcerada durante o seu embarazo e fusilada na prisión militar de Ferrol en 1938, tras despedirse do seu pai, do seu marido e do seu fillo acabado de nacer, é unha figura simbólica da resistencia antifascista das mulleres galegas, que neste libro se presenta dunha maneira histórica, fidedigna, contextualizada e real que, non obstante, supera á ficción. Bernardo Máiz Vázquez ten unha ampla obra historiográfica sobre a represión franquista, na que se contan libros como  Galicia na II República e baixo o franquismo, Memoria-catálogo das publicaciones galegas antifranquistas, Resistencia, guerrilla e represión. Causas e Consello de Guerra: Ferrol 1934-1955  ou  Castelo de San Felipe: cárcere e morte .

Para pechar este Abril da Memoria en Marín, Luís Bará Torres presentou o seu libro "Non des a esquecemento", na Biblioteca Municipal.  Con él estiveron a tamén escritora Montse Fajardo e Enriqueta Molas, presidenta de ARMHM. Tivemos, ademáis, o privilexio de escoitar as testemuñas de vida de familiares de Elsa Omil e Eugenio Calviño, veciña e veciño de Marín que sufriron as crueis consecuencias da barbarie franquista. A música estivo nas sensibles mans do dúo Fírveda O mércores 12 asistimos á conferencia "Miguel Hernández Poeta-Pastor-Soldado", a cargo do profesor Santiago Losada Carregal, acompañado dos versos do autor valenciano nun sentido recital nas voces de Charo Miloro, Moshelem, Antía Rey, José A. Giráldez, Víctor e Luis Portas. A música puxérona as violinistas Tati e Lía.        

Aquí vos deixamos unhas fotos do acto do pasado sábado, para conmemorar o aniversario da proclamación da II República. Tras as primeiras notas musicais a cargo da Banda Os Amigos da República, a presidenta, Enriqueta Molas, deu lectura ao manifesto da asociación para este día. Raquel González Caamaño, interveu en nome das persoas que traballan pola recuperación da memoria histórica en Valga, convidadas a participar neste acto; agradeceu o convite de irmandade  e lembrou a Ramón Magariños Duro, xastre valgués que foi directivo da agrupación socialista de Marín e sufríu represión e cárcere logo do golpe do 36. Grazas, unha vez máis, a Carlos Velasco pola súa experta e sentida colaboración. Ademáis da tradicional ofrenda floral ante a Pedra da Liberdade, as actuacións musicais de Andrés, Antonio e Pesqueira; de Carmen Gallego e Moshelem; puxeron o broche emotivo antes de facer a tamén tradicional  foto de familia .

Neste mes de abril, como todos os anos, conmemoramos o aniversario da II República con diversos actos, nos que agardamos nos acompañedes.

Este mes de decembro, o sol quixo reconfortarnos na lembranza ao alcalde Antonio Blanco e aos mariñeiros do noso concello que morreron defendendo a liberdade e a democracia. Moitas grazas a Antón Sobral pola súa intervención, a Samu Acuña e aos gaiteiros por unirnos a través da súa música e a todas as persoas que nos acompañaron neste día.

Como cada setembro, reunímonos no Pozo da Revolta, en Bagüín, para lembrar a Carmen Pesqueira "A Capirota", asasinada pola barbarie franquista.