O martes 18 de agosto, ás 12:30 h., celebramos un sinxelo homenaxe
a Carmen Pesqueira Domínguez “A Capirota”. Dadas
as circunstancias derivadas da pandemia covid-19, foi un pequeno acto simbólico de
lembranza depositando un ramo na praza que leva o nome desta veciña,
“muller valente e loitadora polos dereitos dos traballadores“ (como reza a
praca instalada o día da inauguración de dita praza en agosto de 2018), que se
enfrontou “á manada fascista”.
No 84 aniversario do seu
fusilamento, queremos seguir lembrando a memoria da muller que tivo a
ousadía de encararse aos que truncaron un tempo de esperanza que supuxo a II
República para a clase traballadora . Xunto a ela, quedou ferida de bala
Dolores Blanco Rodal que puido fuxir polo monte e contar os feitos.
O nome de Carmen
Pesqueira trascende no tempo como referente da loita pola liberdade, a
igualdade e a democracia máis alá da historia de Marín, formando parte de
exposicións, proxectos e mesmo obras literarias, como símbolo do empoderamento
das mulleres, sendo pezas fundamentais do desenvolvemento da sociedade en
xeral, e da galega en particular.
Reivindicamos neste acto
o dereito á verdade e á reparación que esixen as vítimas, como un deber moral
da democracia española para que a impunidade dea paso á xustiza.
Adxuntamos
fotos de varios momentos da homenaxe realizada hoxe a Carmen Pesqueira, A
Capirota, na praza que leva o seu nome, coa presencia de veciñas, veciños e
familiares.
Palabras
de Enriqueta Otero, presidenta da Asociación para a Recuperación da Memoria
Histórica de Marín:
"Neste
ano diferente volvemos no 84 aniversario do fusilamento de Carmen Pesqueira
porque seguimos a lembrar a memoria da muller que se encarou aos golpistas que
truncaron un tempo de esperanza que supuxo a II República para a oprimida clase
traballadora. Lembramos tamén á súa compañeira Dolores Blanco Rodal, que ferida
de bala puido fuxir polo monte e ser testemuña desta atrocidade.
Dende
aquí pedimos que a impunidade dea paso á xustiza e recordamos que o dereito á
verdade e á reparación que esixen as vítimas é un deber moral da democracia
española."
Comentarios
Publicar un comentario