93 ANIVERSARIO DA II REPÚBLICA

 

Abre o acto a presidenta da ARMH de Marín, Enriqueta Otero:

" En primeiro lugar imos recordar neste 93 aniversario da República a Umbelina Briones López, que hoxe estaría aquí connosco celebrando este acto como acostumaba facelo cada 14 de abril e acompañándonos nos actos da Memoria, da que ela foi fiel testemuña ao longo da súa dilatada vida. Lembramos tamén a Chelo Santos Alfonso, que dun xeito inesperado nun puido chegar ata este día para estar coa lealdade que sempre amosou coa Memoria de Marín. A nosa gratitude para ámbalas dúas e con elas recordemos agora aquel 14 de abril de 1931, cando ás sete da tarde se organiza unha gran manifestación na Rúa do Sol, para proclamar a República en Marín.

Iníciase a manifestación coa bandeira republicana ao fronte. Escoltada polas bandeiras das sociedades obreiras unha impoñente multitude dirixiuse á Ponte da Liberdade e percorreu seguidamente as principais rúas da vila, chegando ata Cantodarea e Estribela. Ao fronte ían os presidentes e dirixentes do Centro Republicano local e Sociedades Obreiras; a Banda Municipal de Música ao son da Marsellesa, coreada polo público, percorre o itinerario sinalado rematando no Pazo Municipal onde, en presenza do alcalde, foi izada a bandeira republicana entre os entusiastas aplausos. O señor Agustín Rey dirixiu a palabra aos manifestantes para expresar o significaba a proclamación da República no que respeta á orde, a xustiza e a liberdade, sendo moi aplaudido.

O presidente do Centro Republicano, Gonzalo Martín March, que asumiu a representación da alcaldía mentres non foi designada a nova corporación, pediu non arriar a bandeira sen antes defendela apaixonadamente. 

Hoxe lembramos ese período da nosa historia e aos homes e mulleres que xunto a Agustín Rey, José Muíños Touza e Antonio Blanco Solla defenderon a República. Tralo golpe militar, Martín March foi executado en Ourense en setembro de 1936, Agustín Rey marcha de Marín despois de expropiárenlle os seus bens e Antonio Blanco foi executado en Pontevedra o 31 de decembro, tamén en 1936.

Para eles e para quen sufríu a represión, o noso recordo e admiración. Sempre na nosa memoria! Viva a República!".

Intervención de Xulio Pardellas: 

" No contexto político que vivimos nestes días non está de máis recordar algúns dos cambios máis relevantes que trouxo a II República para a sociedade española:

- A reforma agraria, para expropiar latifundios improdutivos e subir os salarios dos traballadores do campo.

- O impulso á educación pública, pasando de 30.000 a 50.000 mestres, duplicando o número de institutos de secundaria e creando as Misións Pedagóxicas.

- Establecemento dun Estado Laico.

- Decreto de vacacións pagadas para tódolos traballadores.

- Establecemento do voto feminino e de tódolos dereitos para as mulleres.

Pero a dereita sempre tivo certos problemas coa memoria. Non é novidade, como tampouco o é que lles custe chamar ditadura aos 40 anos no que o franquismo tivo sometido a este país. O problema, lonxe de minorar, vai a máis proque o Partido Popular conta agora cun compañeiro de viaxe, Vox, negacionista da historia.

Cómpre subliñar a mal chamada proposición de lei de concordia de Castela e León, que non é a primeira: chegaron antes as de Aragón e a Comunidade Valenciana. Todas elas buscan derogar a memoria democrática, sen mencionar as palabras Golpe de Estado e Ditadura nin unha soa vez. Só aluden ao franquismo nunha ocasión e é para acentuar que non hai consenso histórico sobre el _o que é falso_ á vez que equiparan tódolos períodos desde 1931 ata o de agora, igualando democracia e ditadura.

Ademais, estas leis de falsa concordia dificultan ou impiden que os familiares dos desaparecidos encontren aos seus seres queridos. Hai que ter en conta que España é o segundo país do mundo, detrás de Camboia, con máis desparecidos en fosas comúns. Todo este contido lexislativo pretende que se esqueza o que foi o Golpe de Estado que asestou Franco ao sistema democrático da II República e que ocasionou a Guerra Civil.

Non o esquezamos."

Familiares de Umbelina Briones López e Chelo Santos depositan flores ante a Pedra da Liberdade