20 de abril, 19 horas - Biblioteca Pública Municipal - Presentación do libro Galegos no exército de Euzkadi 1936-1937” do investigador marinense Sergio Balchada Outeiral.

O Servizo de Patrimonio Documental e Bibliográfico e o Departamento de Memoria Histórica da Deputación de Pontevedra, da man da Asociación pola Recuperación da Memoria Histórica de Marín, presentará o mércores 20 de abril o libro “Galegos no exército de Euzkadi 1936-1937”  do investigador oriundo de Marín, Sergio Balchada Outeiral.

O acto será as sete da tarde no salón de actos da Biblioteca Pública Municipal de Marín (Avenida de Ourense s/n). A maiores da presenza do autor que disertará sobre o seu traballo de investigación, participarán a deputada de Memoria Histórica da Deputación de Pontevedra, María Ortega, e o secretario da asociación marinense, Tino Iglesias.

Sergio Balchada, Satxa, como historiador e investigador ten numerosos artigos publicados nas revistas Luzes, Aztarna (Revista da Asociación do mesmo nome de Etnografía e Difusión do Alto Nervión), Estibaus (Boletín de Altzako Historia Mintegia) e en Nós Diario.

Dende o ano 2014 publica o blog elgajedeloficio.wordpress.com con varios apartados: Idade Media, Idade Moderna, Guerra Civil Española, cine, ... Satxa tamén é guionista e actor de cine. A modo de exemplo podemos citar a longametraxe Baile en el sindicato ambientada no frente de Álava na Guerra Civil. Tendes un enlace no blog dentro do apartado de cine.

 

“Galegos no exército de Euzkadi 1936-1937” recolle e divulga a presenza de milicianos galegos no “Euskadiko Gudarostea” (Exército de Euskadi). Esta presenza non foi anecdótica e podería superar os dous mil efectivos, en base aos datos obtidos na investigación de Balchada Outeiral. No libro atopamos un apéndice cunha lista de 997 galegos identificados en documentación obtida en distintos arquivos. De eles temos que cerca do 11%, un total de 106, son veciños de Marín e as súas distintas parroquias. Aos xa coñecidos por todas e todos nós como son Emiliano Manduca Rosales Davila, os irmáns Manuel e Antonio Aguete Lino ou os irmáns Antonio, Gerardo, José e Manuel “Muchiquín” Lobeira Rodríguez, temos que sumar 99 nomes adicionais.

Verdadeiramente este libro é un claro exemplo da tremenda importancia do traballo dos investigadores, de que hai que seguir mellorando o acceso aos distintos arquivos (a día de hoxe persisten certos atrancos) e que as administracións e a sociedade civil temos que seguir apoiando a saída a luz e a publicación de ditas investigacións.