25 de setembro de 2022 | Acto de homenaxe ás/aos que defenderon a liberdade no Pozo da Revolta en Bagüín-Mogor (Lugar de Memoria)

 

A Asociación pola Recuperación da Memoria Histórica de Marín organiza o acto anual no lugar do Pozo da Revolta, en Bagüín, en lembranza e homenaxe ás veciñas e veciños que defenderon a liberdade, como Carmen Pesqueira Domínguez “A Capirota”, lavandeira de 29 anos asasinada o 18 de agosto do 36, Elsa Omil, rapada polos falanxistas, e Antonio Martínez Alfonso, canteiro, Augusto Alfonso González, canteiro de 44 anos, e Cristóbal Peñín Alonso, industrial de 42 anos, asasinados o 14 de setembro de 1937.

O acto dará comezo ás 13:00h. e participarán, nesta ocasión, representantes das asociacións de memoria histórica da comarca. Pola Asociación Amigos de Johán Carballeira, de Bueu, intervirá Xosé Novas Piñeiro, pola Asociación Memoria Histórica 28 de Agosto, de Cangas, intervirá Iago Santos Castroviejo e pola Asociación Cultural Irmandade do Dolmen, de Moaña, falará Luis Chapela Bermúdez; ademáis de Queta Otero “Molas”, por parte da ARMH de Marín. Contaremos coas actuacións musicais de A Revolta, grupo de folk combativo, e Os de Marín, grupo de gaitas tradicional.